Hōkūleʻa Update | January 4, 2016

Aloha ahiahi kākou eia nō mākou ma kēia wahi waʻa kaulua o kākou ʻo ia nō ʻo Hōkūleʻa. A ʻo wau nō hoʻi kahi hoa kipa o ʻoukou ʻo Kaleomanuiwa Wong, he wahi haumāna hoʻokele kēia na ke aliʻi nui, ke kahuna nui hoʻokele waʻa ʻo ʻAnakala Bruce Mealoha Blankenfeld. Mahalo no ke kipa ʻana mai iā mākou ma kēia wahi waʻa. Eia nō mākou ke noke nei i ka holo ʻana i ke komohana ʻo ka hale o ia, o ke komohana, ʻo ia nō ʻo ka ʻāina hoʻolua. Ke noke nei nō i ka holo ʻana ma kahi nō o ʻelima mile no kēlā me kēia hola. I luna aʻe paha i lalo iho paha. Eia naʻe, ʻo ka mea maʻamau ʻelima mile no kēlā me kēia hola. Ua maikaʻi nō ka holo mau ana o kēia waʻa he fea wini a he ʻale e hahai mai ana. He nanea nō ka holo ʻana popohe pono nā peʻa a ia mea aku, a ia mea aku. Eia naʻe no ka hoʻokele ana i kēia wahi waʻa ua paʻakikī ʻoiai ua puni mau ka lewa i ke ao ua paʻakikī ka ʻike ana ka lā, ka mahina, ka hōkū. A hele i ʻō a ʻō ka makani ʻaʻole pā mai me ka mālie me ka noke mau mai kahi a i kahi mea lā. No laila paʻakikī ka hoʻokele ʻana i kēia wahi waʻa, eia naʻe eia nō mākou ke holo nei, ke noke nei i ka hoʻokele like me nā kūpuna a pae aku i kahi wahi, kahi moku liʻiliʻi ʻo St. Helena. He wahi leo aloha iā ʻoe e ka uʻi nohea o Maunawili a me nā kānaka aloha ʻāina ma Hawaiʻi a me nā honua holoʻokoʻa. Mahalo no ka hāhai ʻana mau iā mākou, hui hou kākou i kekahi wā aʻe, aloha.

Please help keep us sailing for future generations. All contributions make a difference for our voyage. Mahalo nui loa!